【小B媽】屯門醫院催生記 真係來回地獄又折返人間

順產真係需要好大勇氣，真係令媽媽們來回地獄又折返人間呀~

之前聽啲人話順產生仔好痛，但有幾痛呢，未生果一刻都未知驚，話說我9月26號預產期，一直都有爬文睇要生果時係點，好驚穿咗水自己又唔知。就係22號晚瞓緊覺果時，突然下面感覺”pat”一聲，有一堆水湧出嚟，我即刻醒咗彈起身去廁所望下，仲有血添，咁應該都係時候喇，果時係零晨4點。我即刻叫醒小B爸，平時最少要叫半個鐘先醒嘅佢竟然一叫就醒，神奇！我哋一路準備啲水一路湧出嚟，拎住條毛巾準備好坐車出發去醫院喇！

5:00am
去到醫院巳經要準備入產房，我一啲都唔痛瞓喺度等，因為電話都唔俾帶，所以只有喺度呆等⋯之後隔離個媽媽，佢一入嚟就嗌，我心諗有咁痛？我實在太天真喇當時。

7:00am
過咗2，3個鐘，護士check完都係一度都未開，咁就話要打催生劑，我都想快啲生所以就ok，打催生劑係唔可以食嘢同飲嘢嘅。果然打咗無耐之後開始有啲反應喇，覺得有規律咁痛，但都唔係好痛嘅暫時～護士就俾定個笑氣我話痛就吸啦，開始嚟料喇，覺得痛喇我，但都仲忍到嘅，果時check只係開到2-3度。我一直都想打無痛針因爲我都真係好怕痛，所以我就問護士有無得打啦，結果護士話無呀今日星期日，吓！星期日就無得打架咩？！我好失望咁係到典。

9:00am
護士俾個電話叫我打電話叫小b爸上嚟，佢上到嚟，個陣痛開始頂唔住喇，但其實都只係開到4-5度，護士就教小b爸幫我按摩尾龍骨，但我巳經開始進入瘋狂狀態，每次陣痛都痛到入心入肺，個笑氣巳經吸到無晒氣，俾我一手飛開咗。

12:00pm
我痛到巳經癲咗，感覺到小b要出嚟喇，有種要痾嘅感覺，巳經開到8度喇，護士話準備生喇！之後係陣痛嚟嘅時候就出力痾，痾咗幾次，但我真係無力⋯根據小b爸講，小b個頭出咗嚟又入返去，出嚟又入返去，咁係會俾助產士鬧嘅。

1:00pm
試咗幾次終於出咗個頭喇，但我巳經虛脫⋯助產士即刻話小b個頭卡住咗會好辛苦呀！可能果一刻啲母愛終於湧出嚟，唔知邊度嚟嘅力終於痾到成隻小b出嚟喇！真係暈一暈，之後隻小b就伏咗係我身上，我終於放鬆晒～但係，突然下身劇痛，原來要排番個胎盤出嚟，助產士豪不留情咁大大力撳個子宮，因為話我子宮出血，又要止血，痛到我典嚟典去，之後就到縫針，原來我係無剪到，係自己爆開咗，醫生係有用麻醉藥嘅，不過用咗等於無用，每下拮落嚟都拮心拮肺！然後都係不斷撳子宮，超痛⋯好彩同一時間係咁望住小b同影相，終於捱過咗喇～

我出咗世喇！

更多小B插畫文，請follow小Bの育成Facebook專頁，多謝支持！

小Bの育成Facebook專頁： https://m.facebook.com/happylittlebb/