【Kidult Daddy】童言集：我好辛苦～

很多家長會有個煩惱，在華人社會，教小朋友應該用中文還是英文？這也是毒男爸爸的一個家庭話題。
　　
老人家長輩講中文，工人姐姐講英文，有講國語的街坊，基本上阿仔日日也接觸不同語言。自問自己和老婆並不是 Native English Speaker，唔想教壞細路。見過街上有家長死也要和子女講英文，但滿口懶音加廣東話 Accent，我真心唔知這對小朋友是否好事。我從不勉強，所以主要同阿仔講中文，廣東話。
　　
但不要小看小朋友的語言能力，他們是可以自行翻譯的。婆婆、爸媽、工人姐姐同處一室，毒男爸爸阿仔可以同工人姐姐講英文，轉個頭又同我們講中文。但，有時翻譯功能未完善，蝦碌上來也可以笑爆嘴的?
　　
＊場地：又係飯枱（好似我屋企淨係得張飯枱）
＊年齡：將近三歲
＊背景：阿仔同工人姐姐食飯，媽媽爸爸準備出門。
　　
爸媽：「我地出街啦。拜拜爸爸媽媽啦。」
阿仔：「唔唔唔」含住口飯說。
爸爸：「快啲吞咗先講。」
阿仔：「唔唔唔」一面慢條斯理地吞。
媽媽：「好啦吞咗可以講 ByeBye。」
阿仔手抱著肚子：「我好辛苦～～」
爸媽：「吓？！」
爸爸：「做乜辛苦呀？係咪唔舒服？」
阿仔：「我好辛苦～我好辛苦～～」但仍面露微笑。
工人姐姐：「I think he is okay. Just ate too much.」
爸爸追問：「你係咪好辛苦呀？」
阿仔：「係呀。」
媽媽斷言：「我睇佢應該 Okay。」家庭 CEO 的確係唔同，可以一口咬定。「如果冇乜事爸爸媽媽真係要出門口。」
阿仔笑著揮手：「拜拜。我好辛苦～」
　　
就在我和老婆轉身出門口，門正在關上的一刻，我們聽到阿仔同工人姐姐講：
　　
「I’m so full.」
　　
爸媽已經忍不住笑，再開門，探頭入屋問：「你係好飽，唔係好辛苦？」
阿仔：「係呀，我好辛苦。」
爸媽：「唔係辛苦。係 so full?」
　　
我們解釋給工人姐姐發生了甚麼事，她也笑到哈哈聲。最後一家在笑聲中開始了新的一日。
　　
呢件事是我在寫的時候，仍然覺得超好笑。看來這個有待更新的小孩翻譯系統，要多加學習了。
　　
作者：Kidult Daddy
Facebook：www.facebook.com/kidultdaddy
網誌：kidultdaddy.wordpress.com