退咗奶都餵得返？再度泌乳的追奶歷程
2018-04-10
就由晞晞岀世講起，第一晚BB住特別病房，無機會抱同無埋過身所以係醫院姨姨餵佢奶粉！第二日姑娘教我擠奶，只有小小仲有血絲既初乳，我居然唔知係寶掉左，如是者，個女跟返我之後喺醫院都係食奶粉。到左岀院生完第5日我先識得用泵空泵，居然都有1-3安左右。
老公影晞晞剛岀世既第一張相
初乳
第一次泵奶
但BB食左奶樽後真係唔識埋身，食唔到奶一直都係補粉為主，加上坐月我無乜時間泵奶，到最後一次泵奶係我泵左士多啤梨奶(血奶)，啲奶得返幾滴。因為食得太多雪耳我塞左泵傷左乳線，我放棄了！整個半母乳的過程係維持咗22日！
泵傷左乳線都可以埋身同擠奶嫁！唔好學我咁快放棄
一直覺得自己無奶水，所以餵唔到母乳，事實上係我自己無用心去追奶同維持奶量，心中有點後悔，因為往往最難既事係最容易令人放棄！當晞晞2個月左右，有好多次沖唔切奶粉喊到好可憐哦，我就試下抱佢黎埋身，點知佢識得埋身喎(但4個幾月時試過好抗拒)，原來越大個既BB吸啜能力越好，嗰陣想餵返都餵唔到，因為我無餵咁耐已經回左奶，眼見食奶粉時既晞晞打針同食輪狀身體都好似特別弱雞咁，嗰一刻我知道只有母乳喺BB唔舒服及不同階段都會做抗體！加上我兩個餵母乳的朋友支持我，話我聽有個case係停左一年都追到奶，要記住有餵母乳的朋友像個寶，唔係佢地我唔會堅持到今時今日。我就決心要餵返母乳，上網睇到好多再度泌乳既分享，先知道原來每個生BB既女人只要BB肯吸啜就一定可以餵返，人既身體係俾你保護天災人禍既BB，俾奶水佢維持生命，佢有講就好似嫲嫲婆婆都可以餵返個孫食母乳喎XD
再度泌乳奶量開始時會好少，因為要重新喚醒返身體製造母乳俾BB， 味道係咸咸地，原因係奶水塞在入面太耐，奶水比較透明，係前乳既顏色，過一排就會正常返。
返工時，我就拎個泵返去每三小時空泵，每天我飲3L水，午同晚要飲湯同食白飯，C字按住泵奶及周時擠奶，泵左一星期都有一滴到幾ml。每次有幾多都會拎返去俾晞晞查面或者飲，因為佢真係好愛媽媽奶，我多數會加埋一餐先俾佢飲，但要留意同一溫度才可，咁樣既做法令BB吸收抗體會全面一點。我的母乳知識都係喺母乳群組慢慢學習的。
後來工作關係轉了一日泵4次，每4小時1次，每次泵30分鐘，早晚埋身。我泵奶次數唔算多，但盡量keep住同一個時間泵奶。以下係我追左幾耐同每次泵既奶量(因應身體情況有時多有時少)：
一星期時間，幾ml
一個月，1oz
兩個月，2oz
三個月，3oz
四個月-六個月 3-5oz
之後我轉左埋身放題
晞晞8個月，加固2餐，我每天泵約12安奶 ，就可以全母乳了，全職媽媽後全埋身放題3個月，晞晞都1歲3個月了。雖然有啲人話人奶餵到6個月加固後就唔係好重要，但我就覺得如果有能力都想俾最好既抗體佢，佢病左我都分擔唔到佢既辛苦，但可以提供到有抗體既奶令佢得以舒緩，我的目標是自然離乳！
請珍惜bb跟你最親密的時光
祝大家奶路暢通，長餵長有！